Իրանը չի ցանկանում, որ Իսրայելի հետ հակամարտությունը վերածվի ավելի լայն, տարածաշրջանային պատերազմի, եթե դա չպարտադրվի Թեհրանին, հայտարարել է Իրանի արտաքին գործերի նախարարը՝ հավելելով, որ իրանական կողմը պատասխան հարվածներ է հասցրել ինքնապաշտպանության շրջանակում։
Reuters-ի հաղորդմամբ, Աբբաս Արաղչին քննադատել է Իրանի նավթաքիմիական վերամշակման գործարանների վրա հարվածները՝ նշելով, որ դրանով Իսրայելը ավելի լայն տարածաշրջանային հակամարտության վտանգ է ստեղծում։
«Մենք չենք ցանկանում այս պատերազմը տարածել այլ երկրների կամ տարածաշրջանի վրա, եթե այն մեզ չպարտադրվի», - ասել է նա։
Իրանն ու Իսրայելը երրորդ օրն է՝ փաստացի պատերազմի մեջ են, որն սկսվել է ուրբաթ, երբ Իսրայելը լայնամասշտաբ հարձակում գործեց Իրանի միջուկային և ռազմական օբյեկտների վրա։ Իրանը պատասխան հարվածներ հասցրեց Իսրայելին, և արդեն երրորդ օրն է՝ կողմերը թիրախավորում են միմյանց ենթակառուցվածքներն ու նաև խաղաղ բնակավայրերը։ Երկու կողմերում էլ կան զոհեր և ավերածություններ։
Իրանի գլխավոր դիվանագետը նշել է, որ իսրայելական հարվածները Պարսից ծոցում գտնվող «Հարավային Պարս» գազի հանքավայրին «բացահայտ ագրեսիա և շատ վտանգավոր գործողություն» են։ «Հակամարտությունը Պարսից ծոց տեղափոխելը ռազմավարական սխալ է, և դրա նպատակն է պատերազմը Իրանի տարածքից դուրս տանել», - նշել է նա։
Ըստ CNN-ի՝ Աբբաս Արաղչին նաև ասել է, որ իր երկիրը պատրաստ է եղել շարունակել միջուկային բանակցությունները ԱՄՆ-ի հետ և պատրաստվում էր այսօր Օմանում առաջարկություններ ներկայացնել, սակայն ուրբաթ Իսրայելի հարվածները խափանեցին այդ բանակցությունները և ցույց տվեցին, որ Իսրայելը դեմ է «ցանկացած ձևի բանակցությունների»։
«Ակնհայտ է, որ իսրայելական ռեժիմը չի ցանկանում որևէ համաձայնություն միջուկային հարցի շուրջ. այն չի ցանկանում բանակցություններ և չի ցանկանում դիվանագիտություն»,- ասել է Արաղչին օտարերկրյա դեսպանների հետ հանդիպմանը, որը հեռարձակվել է պետական լրատվամիջոցներով:
Իրանի արտգործնախարարը Իսրայելի հարձակման համար նաև մեղադրել է Միացյալ Նահանգներին, թեև Վաշինգտոնն այս օրերին բազմիցս հայտարարել է, թե որևէ կերպ չի մասնակցել ռազմական գործողություններին։
«Իսրայելի հարձակումը երբեք տեղի չէր ունենա առանց ԱՄՆ-ի հավանության և աջակցության», - ասել է Արաղչին՝ հավելելով, որ չեն հավատում ամերիկյան կողմի հայտարարություններին, թե նրանք չեն մասնակցել վերջին հարձակումներին։
«Անհրաժեշտ է, որ Միացյալ Նահանգները դատապարտի Իսրայելի հարվածները Իրանի միջուկային օբյեկտներին, եթե ցանկանում է ապացուցել, որ իր մտադրությունները բարի են»,- շեշտել է նախարարը։