Մինեսոտայում կրակել են երկու դեմոկրատ քաղաքական գործիչների վրա, նրանցից մեկը սպանվել է: Մինեսոտայի նահանգապետ Թիմ Ուոլցը հայտնել է, որ անհայտ անձը հարձակվել է նահանգի երկու օրենսդիրների տների վրա՝ սպանելով Մելիսա Հորթմանին և նրա ամուսնուն։
Մեկ այլ քաղաքական գործիչ՝ նահանգային սենատոր Ջոն Հոֆմանը և նրա կինը վիրավորվել են։
Հարձակումները տեղի են ունեցել Մինեապոլիսի մոտ գտնվող Չամպլինում և Բրուքլին Պարկում։ Երկու քաղաքական գործիչներն էլ Դեմոկրատական կուսակցության անդամներ են։
Ուոլցը, որը 2024 թվականի ընտրություններում Քամալա Հարիսի փոխնախագահի նախկին թեկնածուն էր, ասել է, որ հարձակումները «կարծես թե քաղաքական դրդապատճառ ունեն»։
«Ռոյթերս»-ը, հղում անելով Բրուքլին Պարկի ոստիկանապետին, նշել է, որ կրակոցներ արձակած կասկածյալը ոստիկանական համազգեստով է եղել։ Տեղական իշխանությունները խորհուրդ են տվել բնակիչներին չբացել դուռը, եթե ոստիկանական համազգեստով անձ թակի դուռը: Ոստիկանները տեղանքում կաշխատեն զույգերով, հաղորդում է տեղական Fox 9 հեռուստաալիքը։
Այլ մանրամասներ այս պահին հայտնի չեն, նաև դրդապատճառը չի հաղորդվում:
